ალბათ მრავალი თქვენგანი დროდადრო თბილისის ქუჩებიდან თვალს შეავლებს ხოლმე სოლოლაკის ქედს, რათა დარწმუნდეს რომ ბიზნესმენ ბიძინა ივანიშვილის მიერ მრავალი წლის წინ დაწყებული ”ბიზნეს-ცენტრის” მშენებლობა დასასრულს მიუახლოვდა და, ამასთან ერთად, აღარ გაგრძელდება საზოგადოებრივი სივრცის სრულიად უკანონო მითვისება, რამაც გამოიწვია ბოტანიკური ბაღის ტერიტორიის ნაწილის პრივატიზაცია, მასთან მისასვლელი საზოგადოებრივი გზების გადაკეტვა და სოლოლაკის ქედის ლანდშაფტის უხეში შეცვლა.

ამას უკვე შევეგუეთ, მთავარია აღარ გაგრძელდეს!!!
”ბიზნესცენტრის” მოპირკეთებული ფასადი და გამწვანებული გარემო თითქოს ამის იმედს გვაძლევს, მაგრამ ცოტამ თუ იცის, რომ ამ იმედის მომცემ პეიზაჟში, ”ბიზნესცენტრის” გვერდით, ხელოვნური მწვანე საფარით ოსტატურად შენიღბულია რკინა-ბეტონის სრულიად ახალი კასკადური კონსტრუქცია.  ქალაქის უმეტესი ნაწილიდან ეს კონსტრუქცია სოლოლაკის ქედის  ბუნებრივ მწვანე ნაწილად მოსჩანს. კონსტრუქცია გვერდებიდან პლასტმასის ბალახის კამუფლიაჟით არის დაფარული, ხოლო მის კალთებზე ძვირადღირებული დეკორატიული ხეებია დარგული, რომლებიც შეუსაბამო პირობების გამო თითქმის ყოველთვე ხმება და რეგულარულად ანახლებენ.  მთელი ამ დეკორაციის მიზანი ერთია - დაფაროს სივრცითი აგრესიის და ანგარიშსწორების  შემზარავი გამოვლინება: კონსტრუქციის  უკან რამდენიმე საცხოვრებელი სახლია მოქცეული, რომელთა სიმახინჯის დანახვა, როგორც სჩანს არ ისურვა  ბიზნესმენმა და გადაწყვიტა ბუნების პეიზაჟით ჩაენაცვლებინა.
ცოლ-ქმრის - ნათელა და ჟორას სახლი ყველაზე უიმედო მდგომარეობაშია იმ პატარა უბნიდან, რომელიც რკინა-ბეტონის კასკადის უკანა მხარეს მოექცა. აქ მზე უკვე შუა დღის შემდეგ ამოდის, ისიც რამდენიმე საათით. ჰაერი ჩაგუბებულია და  კონსტრუქციაზე დარგული მცენარეების სარწყავი წყლის ნესტითაა გაჟღენთილი. ამ სახლის, ისევე როგორც მისი მიმდებარე სახლების საძირკვლები მნიშვნელოვნად ზიანდება გაურკვეველი მიმართულებით ჩამდინარე სარწყავი წყლით თუ კლდის მუდმივი ნგრევის პროცესით. ერთ დროს შეუდარებელი ხედი თბილისზე დიდი ხანია შუშაბანდიდან ორიოდ მეტრში აღმართული ბეტონის კონსტრუქციით შეიცვალა. ამას ემატება მუდმივ ხმაური, თავზე დაყრილ სამშენებლო ნაგავი და მტვერი.  უფრო მეტიც - გვირაბის მშენებლობის გამო მთელს უბანს გაუუქმეს ავტობუსის გაჩერება და ახლა ქალაქთან დამაკავშირებელი ერთადერთი საფეხმავლო გზა საავტომობილო მოძრაობით მძიმედ დატვირთულ გვირაბზე გადის. 
აქ აღარ მოვყვები ამ კონსტრუქციის კანონიერების და კასკადის უკან დარჩენილების მიერ მის შესაჩერებლად  წარმოებული მცდელობების ისტორიას, რადგან ეს აუცილებლად ჩვენი რეალობის დისტოპიურობის მტკიცებამდე მიგვიყვანს, რაც ისედაც ყველამ კარგად ვიცით. ერთ რამეზე მინდა თქვენი ყურადღების გამახვილება: კასკადის მშენებლობა ქედის გასწვრივ კვლავ გრძელდება (ჩემს მიერ ფოტოზე მონიშნული წითელი კონტური), რაც გამოიწვევს ჟორას და ნათელას სახლთან ერთად კიდევ რამდენიმე სახლის გარემოსგან სრულ იზოლაციას. ეს კი იმას ნიშნავს რომ ამ ადამიანებს მოუწევთ არჩევანის გაკეთება: ან დარჩნენ გაუსაძლის პირობებში, ან გაყიდონ თავიანთი სახლები, უკვე რეალური ფასის მეათედად მაინც და გადაიხვეწონ.
www.ureactor.blogspot.com